Piet
Paaltjens
Dichter-dominee 1835 - 1894
Eenuur in die middag
Eenuur in die middag by die Trattoria
'n tafel vir twee staan leeg
sonder dat 'n kelner oor hom buig
met sy skinkbord van Indiese rottang.
Die raffiamatte het hulle weggeneem
uit eerbied vir die gekneusde angelier,
vir die dood wat swart blom
uit elke gekneusde lit
vir dié liefde, wat nooit 'n kans gehad het nie.
Jy kan maar roep tussen een en twee
by die tafel wat staan
tussen die pilare van die Trattoria,
die plek van verliefdes,
wat uitkyk op die straat van die middag.
Jy kan hulle maar roep
op hul geboortename of hul troetelname.
Jy kan hulle roep by elke etensuur
tussen een en twee elke namiddag
maar hulle sal jou nie antwoord nie.
Nòg sal jy hulle sien verbystap
met die kantoorwerkers, die hippies,
die afleweringbodes of die paartjies wat hande vashou.
By die stalletjies met tuisgemaakte erdewerk
soek jy hulle verniet,
en as jy dink jy sal hulle vind
tussen die leeus en die renosters,
die houtbeeldjies en die bontbeesvelskilde
op die hoek by die Afrika-winkel,
dan vergis jy jou,
want jy sal hulle daar nie sien nie.
By die Trattoria, eenuur in die middag,
staan 'n leë tafel vir twee
wat uitkyk op die stoep van die dag.
By die tafel tussen die pilare
die hoek van verliefdes,
staan twee onbesette stoele
en die herinnering is 'n verlepte angelier.
N.A. Liebenberg 1944
Uit: De Afrikaanse poëzie in duizend en enige gedichten
Gerrit Komrij
1999 Uitgeverij Bert Bakker Amsterdam