Piet
Paaltjens
Dichter-dominee 1835 - 1894
It miel is behimmele.
Wurden komme werom
fan in bline muorre.
Stilte giet de glêzen rûn.
Gedachten repetearje
op dearinnend spoar.
It lûd fan in oanstekker.
In eachopslach.
Hannen op it wite kleed
komme wifeljend gear
foar it tankjen.
It tikjen fan de klok,
it mes neist de panne.
Gjin kofje nei diskear.
Fan bûten komt muzyk,
en eltse noat is wier.
Rou wol net
fan 'e taffelsrânen.
Ferdroege krûmels bôle
lizze tusken de planken
fan 'e flier.
Remco Kuiper 1971
Ùt: Hjir 2, april 2006. Frysk literêr tydskrift jiergong 35